mathau o faethu
rhiant a phlentyn
beth yw maethu rhiant a phlentyn?
Gyda’r math hwn o faethu, byddwch yn croesawu rhiant a’u plentyn i’ch cartref. Rydych yn helpu i gadw teuluoedd gyda’i gilydd, ac yn addysgu sgiliau newydd, gan ddarparu clust i wrando a meithrin eu perthynas.
Nod y math arbenigol hwn o faethu yw i chi ofalu am riant sydd wir angen cymorth, fel y gallant ddatblygu’r sgiliau sydd eu hangen arnynt, yn bersonol ac ar gyfer eu plentyn.
pwy all gael ei faethu?
Weithiau gelwir maethu rhieni a phlant yn ‘lleoliad maeth mam a babi’ oherwydd, yn y rhan fwyaf o achosion, mae angen y rhain ar gyfer mamau ifanc sydd ar fin neu newydd roi genedigaeth.
Ond nid yw hyn bob amser yn wir.
Gallai maethu rhiant a phlentyn olygu darparu lle diogel i dad a’i fabi, mam hŷn neu blentyn bach neu weithiau i’r ddau riant gyda’i gilydd, gyda’u plentyn.
beth a ddisgwylir?
Gyda chymorth yr Awdurdod Lleol, byddwch yn meithrin y genhedlaeth nesaf fel y gallant wneud yr un peth.
Bydd disgwyl i ofalwr maeth rhiant a phlentyn:
- Addysgu sgiliau magu plant fel bwydo, ymolchi ac arferion amser gwely
- Annog rhieni i roi sylw cadarnhaol a chynhesrwydd emosiynol a chwarae gyda’r plant
- Dangos ffyrdd i rieni gael perthynas gadarnhaol gyda’u plant
- Rhoi esiampl o rianta da fel y gall rhieni ddysgu beth sydd ei angen ar eu babanod a sut i ymateb yn effeithiol
- Cefnogi rhieni, a allai fod wedi cael plentyndod anodd eu hunain neu sydd wedi profi trais domestig, i wella eu hunan-barch, eu hyder a’u dewisiadau
- Addysgu sgiliau cartref fel cyllidebu a pharatoi prydau bwyd
- Darparu amgylchedd cartref diogel ac anogol i rieni ddatblygu eu sgiliau magu plant
- Arsylwi’r rhyngweithio dyddiol a’r cynnydd rhwng y rhiant a’r plentyn a chadw cofnodion manwl ar gyfer yr asesiad. Goruchwyliwch, ond peidiwch â beirniadu.
- Mynychu cyfarfodydd gyda gweithwyr cymdeithasol a staff cymorth eraill
- Cyfrannu at benderfyniadau a wneir ynghylch yr hyn sy’n digwydd nesaf
pwy all fod yn ofalwr maeth?
Mae pob plentyn yn wahanol, ac mae angen rhiant maeth gwahanol arnynt hefyd. Yn Maethu Cymru, rydym yn dathlu amrywiaeth ein gofalwyr maeth.
Fodd bynnag, er mwyn maethu mam a babi, bydd angen i chi fod yn hyderus a bod yn brofiadol gyda phlant ifanc. Nid yw hyn yn golygu bod yn rhaid i chi fod â phlant biolegol eich hun, ond mae’n rhaid eich bod yn gallu gofalu am fabi ar eich pen eich hun ac addysgu rhywun arall i wneud hynny. Bydd angen i chi fod yn bresennol drwy’r amser.
Fel y rhan fwyaf o faethu, rhaid i chi gael ystafell sbâr gartref. Dylai hyn fod yn ddigon mawr i ddarparu ar gyfer y rhiant a’r plentyn gan gynnwys gwely, cot, a dodrefn arall fel bwrdd newid.
pa mor hir mae lleoliadau maeth rhiant a phlentyn yn parhau?
Fel arfer, bydd rhiant a phlentyn yn aros gyda chi am 12 wythnos, tra bod asesiad yn cael ei gwblhau ar eu gallu i fagu plant. Er y gellir ymestyn hyn os oes angen ychydig mwy o amser a chefnogaeth ar y rhiant.
Gall lleoliad maethu mam a babi barhau’n hirach os yw’r fam yn ymuno â chi cyn iddi roi genedigaeth.
Gallai canlyniad llwyddiannus fod i’r rhiant a’r plentyn symud i mewn gyda’r teulu, i fathau eraill o fyw â chymorth, neu fyw’n annibynnol, wedi’u paratoi’n dda ar gyfer eu rôl fel mam neu dad.
a oes lwfansau maethu mam a babi?
Cefnogi rhiant a babi newydd mewn angen yw’r prif reswm pam mae llawer o bobl yn dewis dod yn ofalwr maeth rhiant a phlentyn, ond bydd arian yn eich helpu i ddarparu’r diogelwch a’r arweiniad hwn. Felly, rhoddir lwfans i bob gofalwr am bob person yn eu gofal ochr yn ochr â’u lwfansau maethu a budd-daliadau eraill y gallai’r awdurdod lleol eu cynnig.
